നീ നിന്റെ വില മറന്നിരിക്കുന്നു

നിന്നെ കാണുമ്പോഴെല്ലാം

എന്നോട് ചേര്‍ക്കാനൊരു മോഹം..

നിന്‍റെ ചിത്രമാകട്ടെ, ഓര്‍മ്മയാകട്ടെ

ഒരഭിനിവേശമാണെനിക്കുള്ളില്‍

നിന്നെക്കുറിച്ച് കേള്‍ക്കുമ്പോഴെല്ലാം

നെഞ്ചിലൊരു നോവലും

ഒരു പിടയ്ക്കലും ഒരു തുടിയ്ക്കലും;

നീയെത്ര ഹൃദ്യമാണെനിക്കോര്‍ക്കുക

നിന്നെയെന്റെ നെഞ്ചോട് ചേര്‍ക്കാന്‍

കൊതിച്ച് കൈ നീട്ടുമ്പോഴേക്കും

നീയെനെക്കെത്താ ദൂരത്തേക്ക് പായുന്നത്

വേദനയോടെ ഞാന്‍ കാണുന്നു.

നിന്നെ കൊതിച്ചിരുന്ന്, നിന്നെ കാത്തിരുന്ന്

ഇവര്‍ക്ക് നഷ്ടമായത് സ്വന്തം ജീവിതമാണ്

അഹങ്കാരിയായ സ്വര്‍ണ്ണമേ നീയും

നിന്‍റെ പഴയകാലത്തെ വിസ്മരിച്ചിരിക്കുന്നു..

-ലക്ഷ്മി, പുഴക്കരേടത്ത്